Deputetja e Partisë Demokratike të Kosovës, Blerta Deliu, ka kërkuar përgjegjësi urgjente nga Këshilli Prokurorial lidhur me vrasjen e Arlinda Zekajt në Pejë, duke akuzuar për bllokim të llogaridhënies institucionale.
Përmes një reagimi, Deliu shprehu shqetësimin për dështimin e raportimit të KPK-së para Komisionit për Legjislacion. Sipas saj, me gjithë dakordimin paraprak që Këshilli të raportonte këtë të martë, Komisioni nuk ka dërguar as ftesën zyrtare, duke pezulluar kështu mbledhjen e paraparë.
Ky është postimi i saj i plotë:
Në cilën derë tjetër duhej të trokiste Arlinda që sot të mos dëgjonim arsyetime se kujt nuk i paska kërkuar ndihmë?
Sipas raportimeve, kërkesat e saj u ishin drejtuar edhe Këshillit Prokurorial.
Që të hënën u dakorduam që KPK-ja të ftohej të martën në Komisionin për Legjislacion. As ftesë, as mbledhje!
Pse po vonohet llogaridhënia?
Këshilli Prokurorial duhet të raportojnë urgjentisht, me dokumente dhe përgjigje për çdo veprim e mosveprim. Arlinda kërkoi mbrojtje nga shteti. Familja e saj meriton ta dijë çfarë bëri shteti për të.